Historja

Sieva Design duogáš

Sieva Design lea sámi duodjefitnodat Mázes, maid Iskon Mikku Mihkkala Sara Ellen Anne álggahii 2019is. Árbevirolaš sámi duodji lea vuođđun fitnodagas mas vuhtto bures ahte lea nanu muitaleadji duodji.

Mii lea Sieva Design?

Sátni SIEVA lea sámi dološ sátni. Dat čilge juoida mii lea erenoamaš čáppat, namálassi čábbát go čábbámus, dahje fiidnát go fiidnámus. Sátni SiEvA válljejuvvui fidnu nammán go namás leat eaiggáda namá bustávat mielde.

Sieva Design lea fitnodat mii buvttada árbevirolaš sámi biktasit, ja sámi inspirerejuvvon biktasit heivehuvvon otná áigái . Buktagat leat ráhkaduvvon árbevirolaš vugiidguin ja hábmejuvvo oastti sávaldagáid vuođul . Ekologalaš ceavzilvuohta lea erenoamašvuohta buktagiin maht buvttaduvvojit mis.

Duodjeberoštupmi seailu buolvvas bulvii

Sara Ellen Anne lea bajásšaddan duodjelanjás gos lávii geahččat go eadni goarru. Guolgabeaskideami maid ieš lea beassan oahppat eatnistis luhtte unnoražžan juo, beasaiga Sara Ellen Anne nieiddažat maid oahppat bargat dalle juo go skárriid máhtiiga doallat.

Seammaladje go sudno eadni lea oahpan iežas eatnistis, muoŧain, áhkuin ja máttaráhkuin. Nu seailu duodjeberoštupmi ja duodjemáhttu buolvvas bulvii, ja árbevirolaš máhttu bissu ealasiin.  

 

 

 

 

Min čáppa boazu ja eallinvuohki lea vuođđun ja vuoibmin

Sara Ellen Anne lea boazoeaiggat ja ovttas isidiin ja mánáidguin sii barget bohccuidguin Beaskáđas orohagas, mii lea gaskkal Guovdageainnu ja Áltta. Sin bearraša ealahusas lea árbevirolaš máhttu guovddážis go duojit riegadit ja boazobargguid doaimmahit.

Birástáhttojun luonddu čábbodagáin addá olu vuoimmi ja movtta hutkat ođđa hámiid, go árbevirolaš ávdnasiin galga dudjot sihke ođđamállet ja árbevirolaš buktagit. Ođásmáhtton duojit šaddet muitaleaddji duodjin ,go buktaga erenoamášvuohta govvida min eallinvuogi Sámis.

 

 

 

Háhkan duodjeoahpu bajásšattái­dehtiin ja skuvlla bokte

Sara Ellen Anne lea álot liikon dudjot. Son diđii áigá juo ahte lea duodjeskuvla maid hálidii vázzit. Duodjeoahpahallin beasai eatnistis Jusse Juhan Niillasa Gáre Márjjá lusa, go su čeahpes bagádusaidguin hágai duodjeduođaštusa alcces.

Go bajásšattáidehttiin beasai dudjot ja goarrut justte maid hálidii, de bisui dat dudjonberošstupmi maid, go áigá han son álggii niegadit duodjefitnodaga álggahit maid ieš doaimmaha. Lea nu lihkku leamašan maiddái go beasai iežas áhkus, imiin, vuotnamis ja máttarvuotnamis oahppat dudjot sin vugiid ja hámiid mielde. Divrras oahppu mainnan galga leat giitevaš ja lihkkolaš go beassa oahppat ja nannosit vurket váibmui.